काठमाडौँ । काठमाडौं महानगरपालिका–१० शंखमूलस्थित भ्याली ब्वाइज होस्टेलमा धारिलो हतियार प्रहार गरी युवकको हत्या गरेको आरोपमा प्रहरीले तीन जनालाई पक्राउ गरेको छ।
पक्राउ पर्नेमा बारा कलैया उपमहानगरपालिका–३ का १९ वर्षीय शेखर यादव र प्रमित पटेल तथा होस्टेल सञ्चालक महोत्तरी लोहरपट्टी नगरपालिका–६ का २३ वर्षीय आलोक ठाकुर छन्।
दाङ घोराही उपमहानगरपालिका–१७ का २२ वर्षीय वसन्त कालाथोकीको शुक्रबार बिहान होस्टेलमै हत्या भएको थियो। यादव र पटेललाई प्रहरीले शुक्रबार नै पक्राउ गरेको थियो भने ठाकुरलाई पछि पक्राउ गरिएको हो।
प्रहरीका अनुसार तीनै जनालाई आइतबार अदालतमा उपस्थित गराई अनुसन्धानका लागि पाँच दिनको म्याद थप गरिएको छ।
